A Giuvanenna Ina vota l’era cusèi per tutti a pensa a Giuvanenna intantu che con a fenestra averta a cambia i lensò alla matenna. Detersivu e lavatrice, senza duvei anà cumme se fava ina vota a lavà in tu canà. A nà passà du tempu, in simma ai sassi inzenucià in tantu che u so fiurén u spetava de esse latà. Mma con ietre donne, se parlava anca du mangià e cose fà, per in francu, risparmià. Ina bella pulenta con u furmaggiu fattu in cà. Ina turta de erbette, de risu o de patatte. Ina bonna frittà missa in umidu cusei che in tu piattu, ghe fisse abbondanza e con in bel toccu de pan, lempisse a pansa. Ina ticcia de sigulle, peveron e suchén pien in simma ina fetenna de furmaggiu per gratinà e l’era in piattu, sempre tantu appressà. Se fava u budén con ovu,farenna e latte per mesturà e con ina fetta de pan a merenda l’era preparà. Doppu con u marì, l’era anà a sta in città e pian pianen a vitta l’era cambià. A lavatrice, a television, u telefunu. U fijò l’era bravu a studià e au paeise se turnava sultantu, per el feste cumandà. U tempu però alla svelta l’è passà e da le l’è restà a pensà au paeise, al donne, au canà e ai pagni da lavà. U fijò u gh’à a so famiglia e sempre tantu da lavurà a ne po miga pretende, che u la porta a girà. Ma duman l’è festa i vena tutti da le a mangià. Allura l’à decisu, tantu per cambià A ghe farà ina ticcia de sigulle, peveron e suchén pien, gratinà.