TRENTA GRAM ‘D RIZ

Jer sìra gh’è vansè
‘na méza tgàma ‘d riz.-
La m’dis ‘na sjòra tutta elegànta
intant ch’la butta un sachètt
in t la bòcca vèrta d’un casonètt.
-I ragàs i n gh’èven miga fàmma
j èven magnè fora, pìssa,
patatén’ni e dal zlè con la pàna.-
D’improviz un ricord davànt a j oc
e vedd ‘na vcén’na tutta péla e os.
L’incontrèva dal droghér cuand
da putén’na andèva a fèr la spéza
con me mèdra ala matén’na.
Con ‘na bocén’na èlta mén che ‘na spàna
la tolèva al petròli par la lantèrna
pr’un po’ ‘d lùza,
cuand fora gh’era la galavèrna.
Un méz bocén d’oli e trenta gràmm ‘d riz.
La contèva al monedén’ni pjanén, pjanén
e sospirand la guardèva in t al borsén.
La guéra l’era fnida da socuant an
mo la génta l’era ancorra adrè
a paghèr i dann.
Un gosén d’oli e trenta grànm ‘d riz
e la dzèva che par la sén’na
la gh’n’èva bastansa. E adésa
gh’è i casonètt che i s’limpisson la pànsa.