A PREVISION

L'era anà in tu lagu a pijà l'acqua
con el damigianne ligà in tu carru
tirà da in bo con pasiensa
che a stra u fava per esperiensa.
A camminava e a pensava a ina prevision
che ina senghera vecia e con u bastòn
a gh'ava lesì in t'ina man
in cambiu d'in toccu de pan.
Per l'acqua in amure l'arisse truvà
e in tu co per sempre u ghe sarisse restà
L'era agustu, in cadu da sudà
ma chi gh'era suttu alla pianta a ripusà?
Gh'era in ommu insemme a in fiurén
che a strachéssa a ghe serava j ucen.
"U portu alla fera, ne ghe para miga veira
ma l'è lontan turnumma staseira.
A so mamma l'è morta quande lu l'è nasì
che disgrasia i ne s'en gnanca cugnisì."
U se desedda u fiurén a ghe da in po' d'acqua
u la beiva, l'è fresca a ghe para ina manna
e le a la caressa, cumme se a fesse ina mamma.
Alla svelta a ghe lempissa ina buttiglia
e a vardaia i parena ina famiglia.
L'è scattà quarcosa, che a ne sa miga spiegà
ma l'è tardi l'è vura d'anà.
I se disena i nummi, i se dan l'indirissu,
j en zamò lontan
e u fiurén u se vota a salutà con a man.
In giurnu, che ina turta l'ava apenna sfurnà
d'impruvvisu alla porta a senta picà.
L'è cul'ommu con per man u picén
a la brassa a ghe disa che a ghe vo in granben.
In t in attimu a tavera l'è zamò paricià
e a tuvaja l'è culla che lé l'à ricamà.
Sparissa a turta e anca u buden
i parena ina famiglia missa insemme dau destén.
Doppu pochi meisi, sensa tantu spettà
denansi au Signure i s'en anà a spusà.
Ina mamma pussè brava, u picén
u n'arisse miga pudì truvà
e in cielu gh'è in'atra mamma
che a se metta a ringrasià.