AL VALLSER

2° posto nel Concorso di poesia Cittadella a Parma sez. dialetto parmigiano.

Premiazione 14 giugno 2014

La guèrda al nòn ‘na ragàsa e la ghe dmanda

- Non sit bon ‘d balèer al vallser ? -

- A gh’è mèl se son bon la me putén’na

l’aris balè dala sìra ala maten’na.-

- E con chi t’al balèv?-

- Al balèva con al ragàsi, fin che to nòna

l’è dventèda la me balarén’na. La tgnèva

in simma al me cor, intant che con al bras

ghe strichèva la vitta sotilén’na.-

-T’m’isign nòn ? Dil volti al pòl anca servir.-

In t’n’ètra ca un ragàs al guèrda so nòna

e dop al ghe dmanda. - Nòna, sit bon’na

èd balèr al vallser.- A ghe mèl se son bon’na

al balèva fin da ragàsa.- E con chi t’al balèv?-

-To nòn al me dzeva che s’era la so balarén’na.

Al me tgniva in simma al so cor, ntant 

che con al bras al me strichèva la vitta sotilen’na.-

- T’m’insign nòna, dil volti al pol anca servir.-

I ne s’conòsson miga ancorra mo stasìra

j én in discotéca a balèr sti ragàs e la mùzica tecno

la gh’fa zbàtor al gàmbi e i bras. 

Dop al dj acsì par scarsèr al mètta su un vallser

e al rèsta a guardèr. I stan férom i ragàs

in san miga coza fer. Dop vunna la dis.

- Mi al so balèr, da me nòn m’son fata insgèr.-

Gh’risponda un giòvvon. - Anca mi al so balèr

da me nòna m’son fat insgnèr.- I volèn in simma

ala pissta e lu al la tenna in simma al so cor

E al capissa ch’l’è la so balarén’na, intant

che con al bras al ghe strica la vitta sotilén’na.